Seemannsgarn:
Landgang, Deel 3

vun Günter Sohnemann

Neegsten Dag bi't Fröhstück güng al wedder dat Dickdoon los, wokeen mit welkeen "Swager" weer — also wokeen allns mit Esmeralda in de Puuch west weer. Ik bleev still un tell mit; dat weern rund 24 Mann, de dat behaupten dään.

As wi den drüdden Dag op See weern, full mi op, dat de witt anpöönten Rohre över de Toilettenbecken swatt weern vun öölversmeerte Hannen. De sik dor bi't Pinkeln fasthollen harrn, harrn aasig Pien bi't Waterlaten hatt.

De 24 Mann harrn en Tripper.

Uns drüdde Offzeer weer uns "Dokter" an Bord, he kureer de Tripperkranken mit Penicillin-Sprütten. Se bruken wohraftig den kumpletten Bestand an Penicillin op, den wi an Bord harrn!

Dat sünd se, de Bakterien, de dat so lecker funnen in de Döösköpp ehr Harnröhr: Gonokokken

Över düsse Süük woor Book föhrt, un se weer ok meldeplichtig: in Düütschland wöör Meldung an't Gesundheitsamt gahn.

Ik froog een vun se Süken, woans een dat merken dä bi't Pinkeln. De knappe Anter: "As wenn di een en Stickelwier dör de Harnröhre treckt!" — Ik schudder.

Koptein Ludolf Petersen

Koptein Petersen toov över so veel Dösigkeit.

In de Messe leeg jümmers en grote Karton mit Präservative to'n Gratis-Bruken. Un nu dat. Koptein Petersen ziteer de ganze Mannschap in de Messe. Denn legg he los un wusch uns all den Kopp.
Wat uns infull, ahn Schuul mit Fruuns in'n Haven to slapen usw. He sülven weer noch op Seilscheep fohrt in de Salpeter-Seefohrt. Un Präservative weern dormalen unbekannt. Güngst du an Land, möökst du di en Plaan: supen orr rümhuren.
Dorop kümmt dat an, sä Ludolf Petersen. Un denn geev he uns en Nahülp-Kurs:

Wenn ik supen will, gah ik eerst dorna mit en Fru in de Puuch, dorna kümmt de "Eerste Hülp", wieldat du nienich weetst, wat du di ansteken hest: Du geihst pinkeln un waschst di mit den Urin den Dödel vörn good af — denn Urin is ja quasi steril, keimfrie. Dat deist du, so oft du pinkeln kannst. (Dorwegen vörher supen!) Dorna geihst du fix an Bord un waschst di gründlich mit Kernseep.

De "Eerste Hülp" bruukst ok in den annern Fall, wenn du dat nämli gor nich aftöven kannst, mit en Fru in't Bett to jumpen; man dorna is de Landgang toenn, denn bliffst du nich bi't Beer sitten un giffst de Gonokokken Tied, sik dat in dien Lief komodig to maken. Nee, denn heet dat: Foorts an Bord un her mit de Kernseep!

Dat, sä Ludolf Petersen, weer dormalen uns Mööglichkeit, uns vör Süük to schulen. Hett nich jümmers klappt, avers dat weer un blifft en Nootmaatnahm. Kondome harrn wi nich. Eenzige Alternativ: Enthaltsamkeit.

Kondome, Kondome, Kondome!

Hüüt hebbt wi noog un övernoog Präservative an Bord, de schuult veel beter, un wat doot ji Knallköpp?! — Bruukt dat Tüüch!

Dat weer Koptein Ludolf Petersen, en Mann vun klore Wöör.

Ik tööv bet hüüt noch, wat ik mi bi Esmeralda ansteken heff — man ik denk, dat US-Army-Kondom hett sien Deenst daan.