Rodspon is binn

De Martensmann: En niege Bänkelsang
...un wat dorachter steken deit

vun Hannelore Hinz


Martensmann-Bänkelsang
Text/Melodie: Hannelore Hinz 2008

Mit Rodspon rückt hei wedder ran
ut Lübeck, oll Fründ Martensmann.
Nu gifft’t nen Grund taun Drinken,
wi proosten tau un winken.
Un wer sick nich vullsupen kann,
de is kein recht’ Martensmann.

Klicken Se hier, denn hören Se dat Leed, inspeelt up mien 100 Johr ole historische Treckfiedel.

De Bruukwies dorachter

Tau Anno-Kruk dat oll Ihrgistern 1504 kräg ein lüübsch Ratsdeiner Odder un Bescheid, all an’n Martensabend, 10. Dag in’n Näwelmaand, mit twei Uppasser (Zeugen) ein Fatt Rodspon (Rheinweinmost) denn’ „herzoglichen Hof“ tau Swerin tau oewerbringen.


Dat Martensmann-Logo/Wikimedia Commons

Hm, woans is dat tau dissen Bruuk kam’n, mücht männigein weiten. Ick hal hier mal ut.

An reellsten gellen womoeglich Nahwiesen in dat Mäkelborgsche Urkunn’bauk. So de Indrag in Urkunn’ von 1223 heit dat: "Engelbert, Erzbischof von Köln, gibt den Grafen Heinrich von Schwerin und Volrath von Danneberg jährlich 15 Fuder Wein zu Lehn."
Later noch ein Urkunn’ von 1227 beseggt, dat "Heinrich, Graf von Schwerin, befreiet die Lübecker von jedem Zoll und Ungeld in seinen Landen". Dat gifft oewer ok noch anner Oorten von Vermellen.

Hüh! Also an’n tiedigen Morgen 8. Näwelmaand von dat lüübsche Borgdur ut mit’n ganz gewöhnlichen Stauhlwagen un vier Pierd lang vörspannt füng de Reis’ an.

De Reis vun't Wienfatt (üm un bi Luftlinie)
De Reis vun't Wienfatt (mehr so Luftlinie, dat Fatt wier aver nich per Luftfracht ünnerwegens!)

In Swerin smet de Martensmann de jungen Lüüd hümpelwies’ Noet, Appels un Wittbrot tau. De Rodspon, kein Druppen weniger, käm bi de richtig’ Adress an. Dat wier ’n Grund, de Lüübschen tau Abendköst up’t Sloß intauladen.

Un an’n 11.11. noch eins tau ein Frühstück. Hüt wüür man woll seggen, tau ein natt Frühstück (Frühschoppen). De Martensmann künn wat wegputzen. Keinein künn mit dissen Kierl Maat holln.

„Woll nich vull sick supen kann,
de is keen rechte Martensmann!“

De Sweriner bedankten sick mit Wildbrett un ’n "Martensgulden".

Un denn wier’t ut. Vun 15. Febr. 1817 an nicksnich Martensmann.Prost!

All 1991 makten sick Lüüd, so Dr. Klaus Lüders (Stiftung Mecklenburg) as Hauptinitiater un de Ministerpräsident von Sleswig Holstein, Björn Engholm (’n echten Lüübschen), ’n Kopp oewer dat Wiererläwen von dissen schönen Bruuk. Sei hebben’t schafft!
An’n 7. Näwelmaand 1992 künn nu nah all’ de Johren wedder ein Fatt Wien oewer de Tour Schönbarg un Reihn an de Stadt Swerin ut Fründschaft schenkt warden. Dat möt so bliewen.

Un ick wier as Treckfiedel-Hanne mit bi.


Kiek ok hier: www.martensmann.de
Literatur:
Wossidlo/Teuchert Mecklenburgisches Wörterbuch, Wachholz Verlag Neumünster 1996;
Heike Müns, Von Brautkrone bis Erntekranz, Hinstorff Verlag GmbH, Rostock, 2002
10.11.2008


na baven