Logo "Wunnerwarken in Mäkelborg"Wunnerwarken in Mäkelborg, Deel 32:

Lüchtturm Buk bi Bastorf

vun Hans-J. Grebin


Dei Biller köönt Sei dörch Anklicken vergröttern. Torüch geiht dat denn mit den Torüch-Knoop in'n Browser


Dei Lüchtturm sülvst is nich hooch, aver hei liggt up ein Barg

Einen Lüchtturm anne Ostseeküst twüschen Travemünn un Darßer Uurt — dei Hoechstgelaegene in Düütschland dortau —, den wüllen wi uns jung Verwandte Marlene, uut Löbau in Sachsen bi ehren Beseuk in Rostock, wiesen. Sei hett ein"Faible" för Lüchtturms, wat kein Wunner is.

Tauierst wiern wi mit ehr in Warnmünd', wo sei sick nich satt nauch uut dei Hoecht vonn Turm an'n Teepott seihn künn. Dat Wäärer an'n 7. September wier so richtig för ein Fotografiern eigent, kolle Luft kaem von Nuurdosten un schöne witt Wolken mit. So führn wie oewer Kühlungsborn hoch inne Kühlung na Bastorf rin.

Dei "Kühlung", dat mutt ein dortau seggen, heit nich, dat ein dat tau hitt is; nee, dat is ein iestiedliche Höhenrücken bi uns, dei so'n bäten schräg tau dei Oostseeküst verlöppt.


Bi dat Wuurt "Verlieben" hebbt's dat "i" vergäten

Marlene freute sick mit uns, den hoechstgelaegenen Lüchtturm (wenn hei ook mit 20,8 m Turmhöch tau dei lüttsten Türm in Düütschland gehüürt) tau erleben, dei ganz dicht bi uns inn Häger Uurt, westlich von Kühlungsborn up dei Bukspitz steiht — bi dei Uurtschaft Bastorf — oewer Buk noemt ward. Dei genaue Koordinaten sünd: 54° 07' 55'' nördliche Breite & 11° 41' 37'' östliche Länge — alle 45 Sekunden giwwt hei vier Blinke (ein Rundümm duuert 180 sec) aw.

Oewrigens abends bi Dunkelheit seihn wi uut uns Stuuw in dat Hochhuus in Lütten Klein disse Blinke un Marlene freute sick mit uns oewer dit Erläwnis. Hei lücht 78 m oewer denn Meersspeigel un hett ein Füerhöh' von 95,3 m. Bitt tau 25 Seemeilen kann man dat Lüchtfuer seihn. Dat bedüüt, bit inne Wismarer Bucht is dat Fuer tau seihn un warnt hier ook vör ein Sandbank. Dat Licht schient somit 40,23 km wiet.


Is dei Turm ok lütt, sitt hei doch teemlich hooch

Al 1871 wüür dörch einen nautischen Verein upmarksam maakt woorn, dat dei Küst bit taun Darsser Uurt nicht nauch sicher wier. 1876 loet dei Reichsregierung dei Inrichtung prüfen un noch in dit Johr begünn dat Buen dörch einen Bumeister uut Kröpelin un Arbeiters uut Kühlungsborn. So enstünn dat runn rotfarbich Backsteinmuerwark mit sienen roden Turm mit dat Laternengelücht babenup. Ook an denn Lüchtturmwaerrer harr man dacht. Sien lütt Huus wüür mit denn Turm ünnen verbunnen. Ann 1. Dezember 1878 güng dei Lüchtturm in Betrieb un wier för dei Wismarbucht von groter Bedüdung.

1924/25 wüür dei Petroleumdocht-Befuerung dörch elektisch Licht veraennert. Inne DDR-Tied wir hier ein Kinnerferienlager von dei Nationale Volksarmee. Von 1997 an wüür dat Licht automatisch bedeint un dei Lüchtturmwärrer güng uuter Deinst. In dei Johre 1991 bit 1999 wüür allens saniert un dei Bunnesmarine stellte twei Richtfunkstationen hen.


Dei Richtfunkstation


Blick na Kühlungsborn

Wenn wi von Gedser abends mit dei Fähr kamen sünd, künnen wi datt Fuer vonn Buk seihn. Ann Dach wier dei grote Kühlturm vonn Rostocker Steinkohlenkraftwerk uns heimatlich Hinwies.


Lütten Klein mit Kühlturm


Blick na Nuurdost

Wi sünd natürlich hier mit uns Beseuk hoch gahn un von baben dei schön Uutsicht ower denn Häger Uurt genaaten — inn Westen seihn wi datt Solthaff, na Nuurden hebbt wi dei Ostsee oewerblicken koenen un bitt na Falster (dei Südspitz von Dänemark) seihn künnt, ümmer dei blaage Ostsee un dei witten Wolken vör Oogen und na Osten seihn wi dei Warnowwerft mit ehr Kabelkrananlaach...


Kabelkrananlaach vun'e Warnowwerft


Richtung Salzhaff in'n Westen

...denn baeten wierer na Osten, datt Steinkahlenkraftwerk mit denn hoogen Kühlturm un ook uns Hochhuus in dei Ahlbecker Straat 8 wier tau seihn. Föt Marlene wier allens natürlich ein' grote Oewerraschung, disse Landschaft un dei Ostsee tau erläben. Dei wellige Landschaft mit denn Holt inn Süden gehüürt tau dei Endmoränenlandschaft vonne Kühlung. Oewer uns dei blage Himmel mit lütt un grote Wolken, dei vonn Ostwind dräben wüüren — wat künnt Schöneres gaeben in disse Stunn hier inn Häger Uurt, twüschen dei Ünnerwarnow un Rostock inn Osten un dei Kühlung inn Westen, mit einen Blick na Rerik inn Westen. Dei Nuurden hett uns Marlene dat andahn un sei warrt woll ehren Wech von Löbau, in Sachsen, na hier "baben" maaken, üm Arbeit un dormit ein nieges Ziel in ehr Läben tau finnen.

Bestimmt hüürt wi von ehr in dei nächst' Tied von ehren Umtöch anne Küst mit dei schönen Lüchttürms, datt blage Waarer un dei gesunn Luft in Mäkelbörg-Vörpommern.


Un ganz achtern links kannst dei Küst vun Falster sehn



20.9.2015


na baven