Den Verfater sien Original Hamborger Polizeitschako. De Roos woor in'n Deenst nich dragen. Klick op to'n Vergröttern! — Foto: Feldhusen

 

En Udel ut Hamborg vertellt:
In jeedeen Uniform stickt ook en Minsch

vun Gerd Feldhusen


In jedeene Uniform stickt ook en Minsch.
Twee vun miene Vörgesetzten heff ick besünners in Erinnerung beholen. De een wöör uut de Polizeiführung. He wöör bekannt as en zackigen Vörgesetzten. In miene soziale Sturm- und Drangtiet harr ick mol wedder Geld sammelt för behinnerte Kinner in de Alsterdorfer Anstalten. Vun dat Geld kunn ick twee Rullstöhl köpen.
Bi de Övergaav wöör de Presse un dat Fernsehen dorbi. No den offiziellen Deel gungen wi no dat Michelfelder Kinderheim, för de wi eene Patenschaft övernomen harrn.

In den Flur fangt mit een Mol een vun de behinnerten Kinner luud an to schreen! För een, de dat nicht kennt, is dat seker wat Ungewöhnlichet.

So is dat ook so bi den besogten, zackigen Polizeichef. As he dat Schrieen hört, zuckt' tosomen un blifft stohn. Ick kiek em an un seh, dat he — Tronen in de Ogen hett.
Also doch en Minsch, as du un ick.

Un denn Hannes G. Hannes G. wöör uns' Hunnertschaftsföhrer. En ganz leeven Minschen. Wenn wi jungen Schutzlüüd uns mol "eene Zigarr afholen" mussen, denn hett he uns toeerst kräftig anblöökt. Wenn dat vörbi wöör, sä he tomeist: "Und nun setz dich mal hin, mein Jung. Du hast etwas falsch gemacht, das habe ich dir deutlich gesagt. Das musste auch sein. Aber nun nimm dir das mal nicht so zu Herzen. Als ich so jung war wie du, da habe ich genau die gleichen Fehler gemacht. Und nun geh erst mal in die Kantine und gönn dir einen Kaffee."

Dat wöör Hannes G., seines Zeichens Hauptkommissar.

Oder wi harrn eene Geländeövung in Putlos an de Oostsee. Bevor wi losföhrn, sä he often: "Jungs, denkt daran, dass ihr mir einige Büsche mitbringt für unseren Garten an der Kaserne."
Dat wöör Hannes G.


De Pööks mit de Büxendrägers ward ok Hauptkomissaar! Foto St Louis Art Negative co./Wikimedia Commons

Un een Bild heff ick nich vergeten: Dat is morgens freuh. Dor steiht Hannes G. in den langen Kasernenflur, hett keene Uniformjack an, sünnern blots en Hemd ohn Slips un de swatte Büx mit Büxendräger. Un wat mookt he, de Hauptkommissar? He gifft ganz eenfach de Blomen frischet Woter.

Dat mutt man noch weten: To de Tiet, so üm 1962, dor wöör en Hauptkommissar noch en Minsch, de binoh en Hilligenschien op sien Kopp harr. Un so een... begeet eenfach de Blomen.

No en poor Johrn bün ik ook en Hauptkommissar. An een Dag begeet ick ook de Blomen an miene Deenststell un heff blots en Hemd ohn Slips un en dunkle Büx an mit Büxendräger. Dor fallt mi Hannes G. wedder in.

Een Minsch as Du un ick.

Ov de Studenten, de ick uutbild't heff, ook so över mi denkt?


9.6.2013


na baven