An de Veddeler Brückenwoog

vun Heinz Tiekötter


Kannst di noch besinnen? An'n Sieldiek twüschen Wilhemsborger Stroot un Passierzettel geev dat de eenzige intakte Brückenwoog op'n Weg to'n Grootmarkt. Allens, wat uns Buern ut de Heid un ut dat Ole Land no'n Hamborger Grootmarkt leperten, müss öber düsse Woog un is hier pünnt worrn.


En moderne Brückenwaag

Wi Kinner drepen uns ünnen an de Eck vun'n Passierzettel — de Stratennaam vertellt de Geschichte vun de Steed un heet noch hüüt so. Hier hebbt wi uns to'n Spelen drepen un hier kunnen wi uns besnacken, wo dat wat to organisieren geev. Un so, as de Meuven di all op'n Kieker hebbt, wenn du mit dien Fischbrötchen ut'n Loden kümmst, so harrn wi Göörn jümmers 'n Ahnimus, wenn en Trecker mit'n Anhänger vull Steekreuben, Kohlköpp or Appels no'n Grootmarkt ünnerwegens weer un hier de Brückenwoog anstüer. Wi weern all lang dor un legen op de Luur.

De Wiegemeister in dat lütt Wegehuus harr dat nich licht mit uns. Grood harr he de beiden Tungen twüschen Dumen un Wiesfinger in Balanse un de Bummel hung ruhig, dor jumpten wi Göörn all op den Wogen, üm unsen Andeel to kassieren. He kunn vun Glück seggen, wenn he sik nich de Fingers klemmt hett. Harr he den Bummel, dütmol mit uns Gewicht, wedder uttariert, jumpten wi mit de Beute vun'n Wogen dool un he müss nochmol anfangen. Anfangs weern wi doröber verwunnert, dat de Buern uns Klaueree so hennehmen, ahn in Brass to kamen. Doch denn hett Peter sien Vadder uns vertellt, dat dat teemlich plietsch vun de Buern weer; se kregen uns Gewicht jo mitbetoolt.


In'n Hamborger Haven. Histoorsches Foto

Lang hett dat nich duert, denn geev dat ok 'ne Vereenborung twüschen den Wegemeister un uns Göörn: Wi loten em eerstmol in Roh siene Arbeit moken un achteran leet he sik Tiet mit dat Utfüllen vun de Wiegezettels. So harrn wi Schangs, unsen Andeel för de Veddel to kassieren. Un wedder bleben de Buern ganz gliekmödig; se harrn jo ehre Wiegenote all in de Tasch. Düsse Hannel weer för alle Bedeligten vun Vördeel. Egentlich weern wi de Erfinner vun de "win-win-Situaschoon". Wat wi Göörn dörch uns Klaueree no Huus bröchten, geev uns en annern Status un hett uns to Miternährers mookt. Un Modder hett dat holpen, uns satt to kriegen.


Bild Brückenwaag: Mostin89/Wikimedia Commons
6.12.2020

 


na baven