Brüchen buen



Öresundbrüüch, Bild Kdhenrik/Wikimedia Commons

"Wi Christen hebbt den jümmer anduurn Updraag,
Brüchen vun Minsch to Minsch to buen.
Wi mütt över de Fragen vun Leven
mit de annern snacken un vör allens an de denken,
de an den Rand schoven sünd.
Dat kann in de Gesellschop sien,
dat kann in de Religionen sien orrer in't minschlich Miteenanner.
De ierste grote Pieler is Jesus.
Hei hett de Wand twüschen Gott un de Minschen daalreten.
Dörch sienen Doot an't Krüüz un sien Operstahn
buut hei för uns en Brüüch to't Leven.
In sien Himmelfohrt ward hei de Brüchenbuer twüschen Gott un de Minschen, de Brüüch
twüschen Tiet un Ewigkeit.
In uns Dööp röppt hei uns to sien Nafolg.


Storebæltbrüüch, Foto E.S.Myer/Wikimedia Commons


De Brüüch vun Remagen, Bundsarchiv

De Geschicht vun uns Minschen liehrt uns,
dat Miteenannersnacken keen licht Saak is.
Jüst hunnert Johr is dat her,
dat in't Lege to'n Utdruck keem, woans Minschen Brüchen daalreten
un sik verseggten, miteenanner to snacken.
Dat keem to den furchtboren Iersten Weltkrieg.
Vele annere furchtbore Kriege bröken ut.
Dat wöör en blödig Johrhunnert.

In de Harten vun de Minsch wüssen Muurn vun Arg-Denken,
von Wuut un Hatt gegenöver annere.
Up disse Wies isoleert sik de Minsch in sienen Pick.
Muurn warden hoochtagen, toeerst in de Harten un denn twüschen de Hüüs.
Wat ward denn Versöhnen swoor!
Wi hebbt dat mit de Berliner Muur belevt un seihn nu dat Ungedööm
in Jerusaleem.


"Fence of security", "Sekerheitstuun". Foto: Justin Mcintoch/Wikimedia Commons

Muurn bringt Leed. Aver denn sünd Minschen in Karken toamenkamen,
för den Freden to beden.
Un se sünd mit Kräfft von ehr Beden rutgahn in in ehre Stadt,
Week för Week. Jümmer miehr Minsch slöten sik an.
Un upletzt is de Berliner Muur tosamenbraken.
Dor wiest sik de Bott vun de Christen:
Beden un denn rutgahn un annere de gaude Naricht to bringen,
wona de Menschen to deepst sik lengen doot.
Mit Christus Brüchen buen heit vör allen: beden.
Dat Beden is keen Eenbahnstraat. Dat is en rechte Dialog.
Christus antert un helpt uns.
Dat is nöödig, opmerksaam to sien,
wieldat Jesus af un an liesing snackt.
Hei spreekt to uns dörch dat Evangelium
un dörch uns Begegen mit anner Minschen.
Wichtig is dat, jümmer wedder in dat Evangelium to lesen.

...ut den Vatikaan an'n 23.Mai 2014
na Papst Franziskus (bit up dat Inschuvsel vun de Jerusalemer Muur).

Ik kann dat gaud verstahn, wenn een seggt: Ik kann nich beden.
Un ok wat de Papst raden deit, krieg ik swoor trecht:
"Jümmer wedder in dat Evangelium lesen!
Dat is Beden!"
Schriev di denn Wöör up, de du jümmer wedder giern leest,
de di ansprekt.
To'n Bispill:

Wat keeneen waagt, dat schall ik wagen
wat nüms seggt, dat seggt frie rut
wat nüms denkt, dat waag to denken
wat nüms anfangt, dat bringt trecht
Wennehr nüms ja seggt, seggt doch ja
wenn nüms ne seggt, seggt doch nee
wenn all twieveln, waagt to glöven
wenn all mitdaun, staht alleen
wo all laavt, hefft Bedenken
wo all spöttern, spöttert nich
wo all giezig sünd, wagt to schenken
wo allens düster is, maakt Licht
Dat Krüüz von Jesus Christus
dörchkrüüzt, wat is
un maakt allens nie

na Lothar Zenetti




Bild: Antje Heßler

Gah mit dien upwäuhlt Seel
an de brusen See,
in dat Dunnern vun de Breker,
in de swiegen Wööst!
Huul dien Noot luud rut!
Bölk dien Pien ehm luud
un jümmer luuder
in de Ohrn.
Maal ward ut dat Klagen en Danken
för Bewohren,
ut dat Schimpen
en Laven.
Maal kannst denn villicht seggen

"Amen!"

Dat is förwisslich wohr.
Un twüschen juuch is in't Grööne en niege Brüüch buut.
Un een kann dat Snacken mit ehm ok Beden nömen,
aver bloots, wenn du antreden deist mit de Parool:
Ik warr den Negsten leiv hebben as mi sülvst.


Rudi Witzke
30.5.2014


na baven