Afscheed un Erinnern

vun Rudi Witzke


Afscheed nehmen

Vun't Ewge snackt se
aver denn
kümmt nix miehr
müsst Afscheed nehmen
di trennen
afgeven upgeven
en Deil vun di sülvst
di op un daal
wat de Winnen laten
dat Ruscheln
dat Brusen
dat Starven liernen
elkeen Dag en beten
för dat Niege
dat kümmt
un wenn nix miehr kümmt
denn so is in dat Nix
dat Nix
wat du en Leven lang
söcht hest
en grotes
wunnerbores Nix
aver en Nix
un villicht
lücht dat Nix
in de Düsternis
un swinnt
in helle Hellnis
heegt wat schuult
blieven mutt
di un dien Nix

alltiets

Erinnern

Ne, alleen büst nienich du.
Erinnern blifft dörch kamen Tieden,
sitt maal woll blangen di up een,
denn up de anner Siet,
straakt di un wörgt.
Erinnern warmt un lett di schuddern,
Di lengt na Stunnen,
de ji tosamen verbröcht.

Erinnern singt in frömde, anner Spraken.
Dien Hart, dat harr maal en ganz anner Melodie.
Dat kann nu nich koppheistern, nich juchheien.
Dien Hart driggt Biller in en anner Spraak.
Versöök nich, de to liern.
Dat wöör to lang woll duurn un nix di geven.
Nümm hen, de Spraak, de di vun Harten kümmt,
ok wenn de stammert, stottert:
Dat weern juuch Wöör
in düster un in hellicht Stunnen un Daag.
Un wenn de Sommer noch so hell,
de Sünn miehr as süss di blenkert, bitt,
du warrst un müsst in weikes Licht nu blieven.

Noch kannst du't nich verstahn, warrst klauk nich
ut dit anner liesing-innig Seihn un Hören.
De helle Sünn, de is för anner Tieden.
Dien Sünn hett anner Farven,
dien Klang de annern Töön.

Ne,
nix blifft gries.
Vun swunken Äst drüppt woll Wader.
Druppen drüppt för Druppen. höört nienich up.
Or Traan üm Traan? Woso denn nich?
De höört tosamen, Traan un dien Erinnerung!


Plastik "De Grüvler" vun Jürgen Friede

All Biller: Rudi Witzke
6.8.2017


na baven