E

eBay

En Auktionshus in't WWW. De Adress is www.ebay.de (orr .fr orr .com — de Top-Level-Domain is egaal, eBay gifft dat in meist alle Länner vun de Welt). Jedereen kann dor wat ersteigern orr verkloppen, dat is nich swaar, un dat gifft dor meist alle Waren vun de Welt. — eBay is dat gröttste, avers nich dat eenzige Internet-Auktionshus. Dat gifft spezialiseerte Anbeder, de in ehr Rebetten beter sünd as eBay.

editieren

Wöörtlich "utgeven", d.h. en Datei apenmaken, ehr to verännern. Dat, wat en Editor maakt.

Editor

Wöörtlich "Utgever". En (mehrst eenfaches, slichtes) Programm to'n Bearbeiten (Ännern) vun Datein orr Daten. — In'n wiedern Sinn is jedeen Programm, mit dat een Datein ännern kann, en Editor; dat Gegendeel is denn de Browser, de in'n wiedern Sinn en Programm is, mit dat een Datein bloots ankieken, avers nich ännern kann.

Den Text-Editor vun Windows köönt Se so opropen, as dat Bild rechterhand wiest. De Text-Editor is dorto dacht, eenfachste Datein so as txt-Datein to editeern. He beed nich veel Komfort. Wenn Se en annere Datei in den Editor apenmaakt, seht Se dat reinste Kauderwelsch, so as in dat Bild nerrn, 'neem en Word-Datei apenmaakt woor. In de wirren Teken is de ganze "högere" Kraam vun de Datei codeert. Achtung: Nu nix ännern! Dat geiht in de Büx.

En Word-Datei in'n Editor: Bloots nix ännern!

EDO-RAM

En uurole Aart vun RAM.

Einfügen

Den Inholl vun de Twüschenaflaag jichtenswo wedder afropen. Dat daat Se tomehrst mit den Befehl Bearbeiten | Einfügen. Se köönt dat, wat Se in de Twüschenaflaag daan hebbt, ok in annere Programme wedder infögen, ok mehrmalen un so veel mal, as Se wüllt.

Tipp: Keen Menü Bearbeiten to sehn? Denn probeert Se mal dat Kontextmenü (rechte Muustast) oder den Tastengriep Strg+V. Dat is universell in Windows un funscheneert ok noch in Dialoogfinster un sowat, 'neem dat süß keen Menü gifft.

Eingabe

In'n wiedern Sinn: Allens, wat Se mit de ünnerscheedlichen Ingaav-Reedschapen in den Computer ingeevt. Ingaav-Reedschapen sünd t.B. Muus, Tastatuur, Mikrofoon, Joystick usw.

In'n engern Sinn: De Taste Enter. Enter is de villicht wichtigste Tast op de Tastatuur un hett dordör vele Naams kregen. Return un Eingabetaste orr eenfach Eingabe sünd twee vun düsse velen Naams. Man Enter is an'n mehrsten begäng.

Einsteckkarte

Süh na bi Koort.

Einsteckplatz

Süh na bi Slot.

Elektronik

Elektronik is de Wetenschap vun de elektrischen Schaltungen un Schaltkrinken. Computers bestaht dorut. En Mainboard is t.B. vull vun winzige Schaltkrinken, Transistoren, Dioden, Leiterbahnen etc. De Chips (t.B. BIOS, Prozessor) sünd hooch-integreerte (d.h. lierlütt, man heel leistungsfähig) Schaltkrinken.

Email

Kort: Mail. 'n elektroonschen Breef. Se schreevt dat mit en Email-Programm. Dorbi köönt Se nich bloots den Breef sülven schrieven, Se köönt ok noch Datein anhangen (Attachments). Denn dreegt Se de Email-Adress vun'n Empfänger in. Dat Se de Email afschicken köönt, mööt Se online ween. Denn löppt de över de Datenleitungen vun't Internet na den Empfänger. Faken geiht dat in Minuten. De Afsenderadress warrt automaatsch mitlevert.

Mit Emails warrt vundaag de mehrsten Viren överdragen. Wenn Se emailt, schullt Se op jeden Fall en goden Virenscanner lopen hebben — den Se ok aktuell hollen daat!

Email-Adresse

En Email-Adress süht so ut: naam@server.com orr dat.is.min.naam@hier.wahn.ik.de. Typisch för Emailadressen is dat Teken @ in de Midd. Dat warrt ingelsch "at" nöömt. Vör dat @-Teken steiht dat, wat de Persoon identifizeert, un achtern steiht dat, wat den Server betekent, 'neem de Email hen schall. De Server hett typischerwies achtern noch en Lännerkürzel (top-level-domain) so as .de, .com, .fr usw.

Emoticon

Tosamensett ut de Wöör "Emotion" un "Icon". Dat bedüüd also: en lütt Bild, dat en Geföhl utdrückt. Na, un wat kann dat anners ween as man en Smiley?

Emulation, Emulator

Wat "emuleern" heet, dat namaken — so doon, as wenn. En Emulator in'n Computerberiek is en Programm, dat en anner Hardware- orr Software-Ümgevung vörtuuscht. Bi en Drucker-Emulaschoon deit en Drucker denn so, as weer he en annern Drucker un verstünn de Befehle för den annern Drucker. De Emulator-Software maakt dat mööglich. — Bedreevssystem-Emulaschonen maakt dat mööglich, dat Se t.B. ünner Windows en Emulator-Programm lopen laat, dat dorför sorgt, dat allens so funscheneert, as weer dat Linux orr as weer de PC en Apple Macintosh.

Engine

Ingelsch "Maschien". Dat is en afslaten Deel vun en Programm, de mit anner Delen avers funkschonell tosamenwarkt. T.B. hebbt Virenscanner en Viren-Erkennungs-Engine, de af un to ok bi en Update in en niege Verschoon ankümmt. De warrt denn in dat Programm insett, as een dat Autoradio in't Auto setten kann, bloots dat dat nich "klick" seggt. Un denn arbeit dat Ganze fien wedder tohoop, avers beter as tovöör. — Bi Spele gifft dat t.B. en Grafik-Engine, de dorför tostännig is, de dreedimenschonaale Landschap un Figuurn realistisch op den Billschirm to bringen. Is de Grafik-Engine slecht, süht dat Speel slecht ut.

Ergonomie

De Lehr vun de Anpassung vun Maschinen- un Computerarbeit an den Minschen. De Ergonomie in't Computerwesen schall dorför sorgen, dat de Arbeitswelt an'n PC so utsüht, dat dat den Minschen dorbi goodgeiht. D.h. bi't Sitten schall de Minsch sik nich den Rügg tweimaken; bi't Tippen schallt de Finger op natüürliche Wies op de Tastatuur liggen; de Billschirm schall keen schädliche Strahlung afgeven (dat doot de modernen Flachbillschirme ja sowiso nich mehr, avers fröher, in de Anfangstied vun de Röhrenmonitore, weer dat en groot Problem!); de Disch un de ganze Arbeitsplatz mööt so inricht ween, dat de Licht- un Ruumverhältnisse stimmt un de Minsch sik nich unnödig anstrengt; un ok de Software kann so bedeenerfründlich ween, dat een t.B. nich anduernd twüschen Muus un Tastatuur hen un her grabbeln mutt.

Erweiterungskarte

Süh na bi Koort.

Ethernet

Standard för Nettwarken. Opstunns (1.Quartal 2004) de an'n mehrsten benütte Technik, lokale Nettwarken optobuun. De Kabel, Steckers un Buchsen un ok dat Protokoll sünd dör den Ethernet-Standard fastleggt. Ethernet-Koorten un -Kabel sünd heel billig, un een kann op düsse Wies licht stückerwat Computers sülven vernetzen, t.B. alle Computers in en Familie. Vundaag is de (1.Quartal 2004) Variante "Fast Ethernet" de aktuelle Standard. Dormit is en Datentransfergeswinnigkeit vun 100 MBit per Sekunn mööglich.

Euro

Dat Euro-Teken € kriggt Se, wenn Se togliek de AltGr-Tast un de Tast E daldrückt.

Excel

Dat an'n mehrsten brukte Tabellnkalkulaschoonsprogramm; en Deel vun't Microsoft Office-Paket.

Explorer

Ingelsch: Erforscher. Naam vun twee Programme vun de Firma Microsoft: De Internet Explorer, en Browser, un de Windows Explorer, en Dateiverwaltungsprogramm.

Export, exportieren

En Datei in en anner Dateiformaat afspiekern nöömt een exporteern. De Sinn dorvun is, dat ünnerscheedlich Programme merrnanner Daten uttuuschen köönt. In een Programm exporteert Se en Datei in en anner Formaat, denn köönt Se dat mit en anner Programm apenmaken. — Wenn en Programm dorgegen en anner Datenformaat inleest, heet dat importeern. — Kiek ok na bi konverteern.

Extended Domain

En Domain, in de ehr Naam ok Sünnerteken vörkamen dröfft, t.B. www.plattdüütsch.de. Bet nu (Sommer 2004) gifft dat eerst Domains mit de düütschen Ümluuten ä, ö un ü. Dat ß is noch nich to kriegen. — Uurole Browser köönt düsse Domains nich anstüern.