Rudi Carell hett dat mal schreven:
"Wo is blot de Sommer bleven?"
Nu is he dor mit all sien Pracht,
denn ganzen Dag de Sünn uns lacht,
un liekers sünd wi all an klogen,
de Hitt, de sleit uns op'n Mogen!

De Lüüd rennt rüm mit'n roten Kopp,
un hebbt uk meist en Strohhoot op,
se sweet un sünd denn "missennatt",
in Schatten smitt sik uk uns Katt!

Mi dücht, wat schall blot all dat quäsen,
wi schulln man so tofreden wesen,
wo goot, dat wi en Insel sünd,
künnt in't Water jedeen Stünd,
wi hebbt de Ostsee vör de Döör,
so kriggt de Hitten uns nich möör!

Mal ünnerdükern deit ganz goot,
gifft achteran gliek frischen Moot,
de Sommergäst sik uk doch freit,
wenn man bet'n Hals in't Water steiht,
denkt geern doch so an Fehmarn t'rüüch,
kaamt geern mal weller övern Brüüch.
So schulln wi doch tofreden sien,
un danken Gott för Sünnenschien.