Willst mol'n poor Stünnen mit veel Höög verbringen,
denn drink as Eerstes di en goden Grog,
denn kannst du lachen, snacken un ok singen,
sogor de kolen Fööt warmt he di op.

Un langt dat nich mit een, nimm noch en tweeten,
denn ward di bannig warm ok üm dat Hart,
denn snackst du Plattdüütsch un vergittst dat Queesen
un quälst di gornich mehr üm jedeen Quark.

Kummst denn na Huus, so recht en beten selig,
lätt ok de Slaap nich lang mehr op sick töö'vn,
du dröömst von Grog un büst noch morgen fröhlich
un bi en miese Stimmung nimmst di wedder een.

So'n fienen Rumgrog mutt een doch geneten,
un bi de Rumstadt sünd wi doch tohuus.
Un dorum hebbt wi gorkeen slecht Geweeten,
wi heevt dat Glas un seggt en kräftig "Proost!"