Fastelabm

vun Hannelore Hinz


Prinz Karnevall, Prinz Karnevall,
hei un sin Dam’ spälen mall.
Prinz Karnevall, Prinz Karnevall,
dat Mallen hei hüt sall. –
Hei ladt’ sick väle Gäst’ bautz in,
un all’ mötens narrsch jüst sin.
Prinz Karneval, Prinz Karnevall,
is von Natur all mall. –
Juchuu!

De Elwerrat, de Elwerrat,
de höllt för all’ väl Hoeg parat.
Dat Dörp ward up denn’ Kopp hüt stellt,
un in de Bütt, dor ward’t vertellt.
Wer hüt kein Spaß verknuus’t,
de blifft denn woll tau Huus –
un druus’t!

Nu hüppt as Ierste in de Bütt
de Börgermeister Peiter Schütt.
Hei ökelt sinnig ut sin Sicht,
wiest swienplietsch, kiek, de niege Richt’.
Hei drückt kein Oog nich to,
grient oewer uns’ Niveau, –
sü so!

De Snuten-König mit grot Näs’
möckt hüt as Grotmuul ein Gewääs.
Man, ut sin Nüff’n as ein Pierd
dor puust un snuuwt, dat man verfiert.
Un an sin Snut, ein Kraan,
hängt ein Koem-Buddel an.
Oh Mann!

Un Mudder Griepsch öögt un kreiht,
wän sei sick hüt woll griepen deit, –
nah Kortenleggersch mit de Lücht,
de ümmer noch de Lüüd bedrücht.
Bautz hier Muskanten-Snuten
ludhals ehr einen tuten.
Sching-Bumm!

De Bingels von dat Dörp-Ballett
driest hüppen oewer dat Parkett
un smiet’n in de Höcht de Bein’,
de Frugens as de Hahnen kreihn.
Un mank dat lude Dallern
de Narrschen bannig ballern.
Juchuu!

Un ümmer mihr noch ströpen rinn,
dat ganze Dörp in smucke Plünn.
Tau wenig Stäuhl, dat is nich got,
rasch hüppen Dierns up denn’ Schot
von Emil, Korl un Luten.
Hüt blifft keinein nich buten.
Jawoll!

Prinz Karnevall, Prinz Karnevall,
hei un sin Dam’ spälen mall.
Prinz Karnevall, Prinz Karnevall,
dat Mallen hei hüt sall. –
Hei ladt’ sick väle Gäst’ bautz in,
un all’ mötens narrsch jüst sin.
Prinz Karneval, Prinz Karnevall,
is von Natur all mall. –
Juchuu!


8.2.2009


na baven