Wi wünschen allens Gode för de tokamen Tiet
un dat Se jümmer 'ne Luus in'n Kohl hebben, dat's beter as gor
keen Fleesch.
Wi wünschen, dat dat ok bottert, wenn Se bottern doot,
dat Se nich in Brummelbeeren haken blieven,
dat Se Nettel un Düvel jümmer mit faste Hannen anfaten,
dat Se jümmer enen Halm up'n Spieker hebben,
un dat Se nich vergeten, dat achtern Barg ok noch Lüüd wahnen.
Wi wünschen, dat Se eten, wat Se hebben un singen, wat
Se weten,
dat en goot Woort un en goot Pott Se jümmer na Huus hen halen,
dat Se sik jümmer an'n Tuun fasthollen, de Heven is to hooch!
Wi wünschen, dat Se nie nich Sacksband as Sied up de Vigelien
spannen mütten,
dat Se jümmer en Schipp hebben, wenn Se to See mütten,
dat Se sik nich vör'n doden Kievitt grugen,
dat bi't Angeln de eerste Fisch nich en Boors is,
dat Se öftins allens Sülver up'n Disch packen können
un dat Se nich japsen mütten as en Kreih bi Hitt up'n Tuunpahl.
Wi wünschen, dat Se nüms begegent, de den Düvel ut
de Braatpann hüppt is,
un dat Se sik jümmer Botter dick smeern können, dor is noch
nüms an stickt.
Dat un noch veel mehr wünschen wi vun Harten!
Uns' Wünsch sünd Snacks ut
de sweedsch-vörpommersch' Eck,
sammelt un upschreven vun Rudi Witzke.
|